تخاريف

ف الليل بعد الحياة ماتنام.

والصمت يملا دينتى وف وحدتى اصب م الذكريات

كاسات....

اشربها....

انسطل....

وتبدأ التخاريف

بضحكة حزينة

فوق شفايفى

ترسم ملامحى من جديد

ترسم على وشى العنيد

شكل مخيف

يزعج مرايتى المعتمة

والمؤمنة

بوشى القديم

والقانى

فى سكة واخدانى

لمكان اول لقا

بينى وبين نفسى البرئية

قصدى...

اللى كانت برئية

واتبدلت فى زمن الزيف

نفسى اوصل

لكن طريقى

مش بيكمل..

وتتوه الخطوةمنى

حلمى الجميل

غصب عنى

ينكسر فتافيت

تنفرط عناقيد

الشوك جوايا

تمزعنى...

تصدمنى...

وافوق من الصدمة

آلاقى ..

نفسى فوق رصيف

بتسول البسمة

من عيون الفرحانين

وابيع الدمعة

للى غاوى يموت حزين

واناااام

حاضن وحدتى

ودمعتى ملو الكفوف

احلم...

وف الحلم اشوف

ذكريات...

مالية الكاسات

اشربها...

انسطل...

وتبدأ التخاريف.